• A semana pasada tivo lugar o simbólico comezo da rehabilitación do primeiro edificio da Cidade das TIC, coa presenza do reitor da Universidade da Coruña, Julio Abalde, e do presidente do Clúster TIC Galicia, Antonio Rodríguez del Corral, entidades promotoras da iniciativa.

• Asistiron o vicepresidente segundo e conselleiro de Economía, Empresa e Innovación, Francisco Conde; o delegado do Goberno en Galicia, José Manuel Miñones; a alcaldesa do Concello da Coruña, Inés Rey; o delegado de Defensa en Galicia, Antonio Bernal, o presidente da Deputación da Coruña, Valentín González Formoso, a subdelegada do Goberno na Coruña, María Rivas; e o delegado da Xunta na Coruña, Gonzalo Trenor, xunto co arquitecto autor do proxecto do CSA, Carlos Pita, e o director da empresa adxudicataria da obra, Construción ACCIONA, Alejandro Casielles.

A Cidade das TIC acolleu o acto simbólico de inicio das obras do Centro de Servizos Avanzados ( CSA), o primeiro edificio en rehabilitarse no que foi o complexo da Fábrica de Armas e que será xestionado polo Clúster TIC Galicia.

O Centro de Servizos Avanzados será ocupado por empresas tecnolóxicas e converterase en sede dalgunhas empresas e tamén das unidades de I+D que necesite o sector empresarial que funcionarán de forma colaborativa. Intelixencia Artificial, Internet das cousas, Dispositivos intelixentes, Media e Quantum. Será ademais o gran escaparate multimedia do sector e traballará de forma coordinada con centros e hubs de innovación sectoriais.

O CSA é un edificio que nace “cheo”, asegurou o presidente do Clúster TIC, e que xa desbordou os límites de espazo debido ás numerosas demandas das empresas do sector por instalarse na Cidade das TIC; de feito, desvelou Rodríguez del Corral, tiveron peticións para completar outras dúas naves que están á espera de financiamento. “Insistimos nisto porque Galicia necesita unha referencia física e tecnolóxica de sinal internacional, que atraia máis empresas e talento e nós apostamos pola Cidade das TIC”.

Rodríguez del Corral reiterou as súas felicitacións ao Igape e á Vicepresidencia 2ª. CFAs de Galicia, agradecendo o apoio recibido de Altia, Plexus, Imatia, Aldaba, Itelsis, Dos Espacios, ITG, Xoia, Librebit e Visual Publinet e a todas as institucións que o apoian e financian:Vicepresidencia da Xunta, Concello da Coruña, Deputación da Coruña e Goberno deEspaña e especialmente á Universidade da Coruña.

A Cidade das TIC recibiu o apoio financeiro de 4,8 millóns de euros da Xunta de Galicia, a través do Igape, para a construción do Centro de Servizos Avanzados. O proxecto do arquitecto Carlos Pita foi o gañador do concurso para a rehabilitación da Fábrica de Armas como Ciudad das TIC así como para o deseño do primeiro dos edificios, o CSA, que ocupará unha das naves da Fábrica de Armas. A empresa ACCIONA executará as obras de rehabilitación por un importe de 3,5 millóns de euros e que se prevé finalicen en febreiro de 2023.

Para o CSA propóñense unha construción de 2.627 metros cadrados entre a planta baixa e a entreplanta destinados a empresas TIC; e 2.069 metros cadrados para laboratorios, aulas e zonas comúns (cafetería, espazos de traballo informais, instalacións...). O proxecto de Carlos Pita expón a potenciación da tipoloxía basilical do edificio coa introdución dunha nova construción de madeira de 440 metros cadrados, destinado a aulas, coworking, cafetería e espazo informal.


Intervención do presidente do Clúster TIC Galicia durante o acto simbólico de inicio das obras do Centro de Servizos Avanzados.